1 Samuel 19
1ⲁⲩⲱ ⲥⲁⲟⲩⲗ ⲁϥϣⲁϫⲉ ⲙⲛ ⲓⲱⲛⲁⲑⲁⲛ ⲡⲉϥϣⲏⲣⲉ ⲁⲩⲱ ⲛⲉϥϩⲙϩⲁⲗ ⲧⲏⲣⲟⲩ ⲉⲙⲟⲩⲟⲩⲧ ⲛⲇⲁⲩⲉⲓⲇ 2ⲓⲱⲛⲁⲑⲁⲛ ⲇⲉ ⲡϣⲏⲣⲉ ⲛⲥⲁⲟⲩⲗ ⲛⲉϥⲙⲉ ⲛⲇ︤ⲁ︦ⲇ︥ ⲉⲙⲁⲧⲉ ⲁⲩⲱ ⲓⲱⲛⲁⲑⲁⲛ ⲁϥⲧⲁⲙⲉⲇ︤ⲁ︦ⲇ︥ ⲉϥϫⲱ ⲙⲙⲟⲥ ϫⲉ ⲥⲁⲟⲩⲗ ⲕⲱⲧⲉ ⲛⲥⲁ ⲙⲟⲟⲩⲧⲕ ⲧⲉⲛⲟⲩ ϭⲉ ϩⲁⲣⲕ ⲙⲡⲛⲁⲩ ⲛϩⲧⲟⲟⲩⲉ ⲛⲣⲁⲥⲧⲉ ⲛⲅⲟⲗⲕ ⲛⲅϩⲙⲟⲟⲥ ⲛⲧⲟⲕ ϩⲛ ⲟⲩⲙⲁ ⲛϩⲱⲡ 3ⲁⲩⲱ ⲁⲛⲟⲕ ϯⲛⲁⲧⲱⲟⲩⲛ ϩⲁⲧⲙ ⲡⲁⲉⲓⲱⲧ ⲛⲧⲁⲉⲓ ⲛⲁⲕ ⲉⲧⲥⲱϣⲉ ⲉⲡⲙⲁ ⲉⲧⲉⲕⲛⲁϣⲱⲡⲉ ⲛϩⲏⲧϥ ⲁⲛⲟⲕ ⲟⲛ ϯⲛⲁϣⲁϫⲉ ⲙⲛ ⲡⲁⲉⲓⲱⲧ ⲉⲧⲃⲏⲏⲧⲕ ⲛⲧⲁⲛⲁⲩ ⲉⲡⲉⲧⲉϥⲛⲁϫⲟⲟϥ ⲁⲩⲱ ⲡϣⲁϫⲉ ⲉⲧⲛⲏⲩ ⲉⲃⲟⲗ ϯⲛⲁⲧⲁⲩⲟϥ ⲉⲣⲟⲕ 4ⲓⲱⲛⲁⲑⲁⲛ ⲇⲉ ⲁϥϣⲁϫⲉ ⲙⲛ ⲥⲁⲟⲩⲗ ⲡⲉϥⲉⲓⲱⲧ ⲉⲧⲃⲉ ⲇⲁⲩⲉⲓⲇ ⲕⲁⲗⲱⲥ ⲉϥϫⲱ ⲙⲙⲟⲥ ⲛⲁϥ ϫⲉ ⲙⲡⲉⲣⲧⲣⲉⲡⲣⲣⲟ ⲉⲣⲛⲟⲃⲉ ⲉⲇ︤ⲁ︦ⲇ︥ ⲡⲉϥϩⲙϩⲁⲗ ϫⲉ ⲙⲡⲉϥⲣⲛⲟⲃⲉ ⲉⲣⲟⲕ ⲁⲩⲱ ⲛⲉϥϩⲃⲏⲩⲉ ⲛⲁⲛⲟⲩⲟⲩ ⲉⲙⲁⲧⲉ 5ⲁⲩⲱ ⲕⲥⲟⲟⲩⲛ ϫⲉ ⲁϥⲕⲁⲧⲉϥⲯⲩⲭⲏ ϩⲛ ⲛⲉϥϭⲓϫ ⲁϥⲃⲱⲕ ⲉⲃⲟⲗ ⲁϥⲡⲁⲧⲁⲥⲥⲉ ⲙⲡⲁⲗⲗⲟⲫⲩⲗⲟⲥ ⲁⲩⲱ ⲡϫⲟⲉⲓⲥ ⲁϥⲉⲓⲣⲉ ⲛⲟⲩⲛⲟϭ ⲛⲟⲩϫⲁⲓ ⲙⲡⲓ︤ⲏ︦ⲗ︥ ⲁⲩⲛⲁⲩ ⲉⲡⲟⲩϫⲁⲓ ⲁⲩⲣⲁϣⲉ ⲉⲧⲃⲉ ⲟⲩ ϭⲉ ⲉⲕⲛⲁⲣⲛⲟⲃⲉ ⲉⲩⲥⲛⲟϥ ⲛⲁⲧⲛⲟⲃⲉ ⲉⲙⲟⲩⲟⲩⲧ ϩⲓⲛⲁⲓ ⲛⲇ︤ⲁ︦ⲇ︥ ⲉⲡϫⲓⲛϫⲏ 6ⲥⲁⲟⲩⲗ ⲇⲉ ⲁϥⲥⲱⲧⲙ ⲛⲥⲁ ⲡⲉϩⲣⲟⲟⲩ ⲛⲓⲱⲛⲁⲑⲁⲛ ⲡⲉϥϣⲏⲣⲉ ⲁⲩⲱ ⲥⲁⲟⲩⲗ ⲁϥⲱⲣⲕ ⲉϥϫⲱ ⲙⲙⲟⲥ ϫⲉ ⲡϫⲟⲉⲓⲥ ⲟⲛϩ ⲉϣⲱⲡⲉ ⲇ︤ⲁ︦ⲇ︥ ⲛⲁⲙⲟⲩ 7ⲁⲩⲱ ⲓⲱⲛⲁⲑⲁⲛ ⲁϥⲙⲟⲩⲧⲉ ⲉⲇ︤ⲁ︦ⲇ︥ ⲁϥⲧⲁⲩⲟ ⲉⲣⲟϥ ⲛⲛⲉⲓϣⲁϫⲉ ⲧⲏⲣⲟⲩ ⲁⲩⲱ ⲓⲱⲛⲁⲑⲁⲛ ⲁϥϫⲓ ⲛⲇⲁⲇ ⲉⲣⲁⲧϥ ⲛⲥⲁⲟⲩⲗ ⲁⲩⲱ ⲛⲉϥϩⲁ ⲡⲉϥϩⲟ ⲡⲉ ⲛⲑⲉ ⲛⲥⲁϥ ⲙⲛ ϣⲉⲙⲛⲧ ⲙⲡⲟⲟⲩ ⲛϩⲟⲟⲩ 8ⲡⲡⲟⲗⲉⲙⲟⲥ ⲇⲉ ⲁϥⲟⲩⲱϩ ⲉⲧⲟⲟⲧϥ ⲉⲧⲣⲉϥϣⲱⲡⲉ ⲁⲩⲱ ⲇⲁⲩⲉⲓⲇ ⲁϥϭⲙϭⲟⲙ ⲁϥⲡⲟⲗⲉⲙⲉⲓ ⲙⲛ ⲛⲁⲗⲗⲟⲫⲩⲗⲟⲥ ⲁϥⲡⲁⲧⲁⲥⲥⲉ ⲙⲙⲟⲟⲩ ⲛⲟⲩⲛⲟϭ ⲉⲙⲁⲧⲉ ⲙⲡⲗⲩⲅⲏ ⲁⲩⲱ ⲁⲩⲡⲱⲧ ϩⲁ ⲡⲉϥϩⲟ 9ⲟⲩⲡ︤ⲛ︦ⲁ︥ ⲙⲡⲟⲛⲏⲣⲟⲛ ⲁϥⲉⲓ ⲉϩⲣⲁⲓ ⲉϫⲛ ⲥⲁⲟⲩⲗ ⲁⲩⲱ ⲛⲧⲟϥ ⲛⲉϥⲉⲛⲕⲟⲧⲕ ϩⲙ ⲡⲉϥⲏⲓ ⲛⲉϥⲛⲏϫ ⲉⲣⲉⲧⲉϥⲗⲟⲅⲭⲏ ϩⲛ ⲧⲉϥϭⲓϫ ⲇⲁⲩⲉⲓⲇ ⲇⲉ ⲛⲉϥⲯⲁⲗⲗⲉⲓ ϩⲙ ⲡⲟⲣⲅⲁⲛⲟⲛ ⲉⲧϩⲛⲛⲉϥϭⲓϫ 10ⲁⲩⲱ ⲥⲁⲟⲩⲗ ⲉϥⲕⲱⲧⲉ ⲛⲥⲁ ⲑⲏ ⲛⲣⲱϩⲧ ⲛⲇⲁⲩⲉⲓⲇ ϩⲛ ⲧⲗⲟⲅⲭⲏ ⲉⲧϩⲛⲧⲉϥϭⲓϫ ⲇⲁⲇ ⲇⲉ ⲁϥⲡⲟϣⲥϥ ϩⲁ ⲡϩⲟ ⲛⲥⲁⲟⲩⲗ ⲁⲩⲱ ⲥⲁⲟⲩⲗ ⲁⲧⲉϥⲗⲟⲅⲭⲏ ⲧⲱⲝ ⲉϩⲟⲩⲛ ⲉⲧϫⲟ ⲇ︤ⲁ︦ⲇ︥ ⲁϥⲟⲗϥ ⲁϥⲟⲩϫⲁⲓ ⲁⲩⲱ ⲧⲗⲟⲅⲭⲏ ⲁⲩⲧⲟⲕⲙⲉⲥ ⲉⲃⲟⲗ ϩⲛ ⲧϫⲟ 11ⲁⲥϣⲱⲡⲉ ⲇⲉ ϩⲛ ⲧⲉⲩϣⲏ ⲉⲧⲙⲙⲁⲩ ⲥⲁⲟⲩⲗ ⲁϥϫⲟⲟⲩ ⲛϩⲉⲛⲃⲁⲓϣⲓⲛⲉ ⲉⲡⲏⲓ ⲛⲇⲁⲩⲉⲓⲇ ⲉⲣⲟⲉⲓⲥ ⲉⲣⲟϥ ⲉⲧⲣⲉϥⲙⲟⲟⲩⲧϥ ⲉϩⲧⲟⲟⲩⲉ ⲙⲉⲗⲭⲱⲗ ⲇⲉ ⲧⲉϥⲥϩⲓⲙⲉ ⲁⲥⲧⲁⲙⲉⲇ︤ⲁ︦ⲇ︥ ⲉⲥϫⲱ ⲙⲙⲟⲥ ⲛⲁϥ ϫⲉ ⲛⲧⲟⲕ ⲉⲕⲧⲙⲛⲉϩⲙⲧⲉⲕⲯⲩⲭⲏ ⲛϯⲟⲩϣⲏ ⲥⲉⲛⲁⲙⲟⲟⲩⲧⲕ ⲛⲣⲁⲥⲧⲉ 12ⲁⲩⲱ ⲙⲉⲗⲭⲱⲗ ⲁⲥⲟⲩⲱⲧⲃ ⲛⲇ︤ⲁ︦ⲇ︥ ⲉⲃⲟⲗ ϩⲙ ⲡϣⲟⲩϣⲧ ⲁϥⲧⲱⲟⲩⲛ ⲁϥⲡⲱⲧ ⲁϥⲛⲁϩⲙⲉϥ 13ⲙⲉⲗⲭⲱⲗ ⲇⲉ ⲁⲥϫⲓ ⲛⲛⲉⲥⲙⲟⲧ ⲛⲧⲕⲁⲓⲥⲉ ⲁⲥⲕⲁⲁⲩ ϩⲓϫⲙ ⲡⲙⲁ ⲛⲛⲕⲟⲧⲕ ⲁⲩⲱ ⲟⲩϩⲩⲡⲁⲣ ⲛⲃⲁⲁⲙⲡⲉ ⲁⲥⲕⲁⲁϥ ϩⲓϫⲱϥ ⲁⲥϩⲟⲃⲥϥ ⲛⲟⲩϩⲟⲉⲓⲧⲉ 14ⲥⲁⲟⲩⲗ ⲇⲉ ⲁϥϫⲟⲟⲩ ⲛϩⲉⲛⲃⲁⲓϣⲓⲛⲉ ⲉϫⲓ ⲛⲇⲁⲩⲉⲓⲇ ⲛⲁϥ ⲡⲉϫⲁⲩ ϫⲉ ϥⲙⲟⲕϩ ⲛϣⲱⲛⲉ 15ⲥⲁⲟⲩⲗ ⲇⲉ ⲁϥϫⲟⲟⲩ ⲛϩⲉⲛⲃⲁⲓϣⲓⲛⲉ ⲛⲥⲁ ⲇⲁⲩⲉⲓⲇ ⲉϥϫⲱ ⲙⲙⲟⲥ ⲛⲁⲩ ϫⲉ ⲧⲁⲗⲟϥ ⲉϫⲙ ⲡⲉⲓϭⲗⲟϭ ⲛⲧⲉⲧⲛⲛⲧϥ ⲛⲁⲓ ϫⲉ ⲉⲓⲉⲙⲟⲟⲩⲧϥ 16ⲛⲃⲁⲓϣⲓⲛⲉ ⲇⲉ ⲁⲩⲉⲓ ⲁⲩⲱ ⲉⲓⲥ ⲛⲉⲥⲙⲟⲧ ⲛⲧⲕⲁⲓⲥⲉ ⲛⲉⲩϩⲓϫⲙⲡⲉϭⲗⲟϭ ⲁⲩⲱ ⲟⲩϩⲩⲡⲁⲣ ⲛⲃⲁⲁⲙⲡⲉ ⲛⲉϥⲕⲏ ϩⲁϫⲱϥ 17ⲡⲉϫⲉⲥⲁⲟⲩⲗ ⲙⲙⲉⲗⲭⲱⲗ ϫⲉ ⲉⲧⲃⲉ ⲟⲩ ⲁⲣⲉⲣϩⲁⲗ ⲙⲙⲟⲓ ϩⲓⲛⲁⲓ ⲁⲩⲱ ⲁⲣⲕⲱ ⲉⲃⲟⲗ ⲙⲡⲁϫⲁϫⲉ ⲁϥⲛⲟⲩϩⲙ ⲡⲉϫⲉⲙⲉⲗⲭⲱⲗ ⲛⲥⲁⲟⲩⲗ ⲡⲉⲥⲉⲓⲱⲧ ϫⲉ ⲛⲧⲟϥ ⲡⲉ ⲛⲧⲁϥϫⲟⲟⲥ ⲛⲁⲓ ϫⲉ ⲕⲁⲁⲧ ⲉⲃⲟⲗ ⲛⲧⲁⲃⲱⲕ ⲉϣⲱⲡⲉ ⲙⲙⲟⲛ ϯⲛⲁⲙⲟⲟⲩⲧⲉ 18ⲇ︤ⲁ︦ⲇ︥ ⲇⲉ ⲁϥⲡⲱⲧ ⲁϥⲛⲟⲩϩⲙ ⲁϥⲉⲓ ⲉⲣⲁⲧϥ ⲛⲥⲁⲙⲟⲩⲏⲗ ⲉⲁⲣⲙⲁⲑⲁⲉⲓⲙ ⲁϥⲧⲁⲩⲉⲑⲉ ⲉⲣⲟϥ ⲛϩⲱⲃ ⲛⲓⲙ ⲛⲧⲁⲥⲁⲟⲩⲗ ⲁⲁⲩ ⲛⲁϥ ⲁⲩⲃⲱⲕ ⲇⲉ ⲛϭⲓ ⲇ︤ⲁ︦ⲇ︥ ⲙⲛ ⲥⲁⲙⲟⲩⲏⲗ ⲁⲩϩⲙⲟⲟⲥ ϩⲛ ⲁⲩⲁⲑ ⲛⲧⲉ ϩⲣⲁⲙⲙⲁ 19ⲁⲩⲧⲁⲙⲉⲥⲁⲟⲩⲗ ⲉⲩϫⲱ ⲙⲙⲟⲥ ⲛⲁϥ ϫⲉ ⲉⲓⲥ ⲇⲁⲩⲉⲓⲇ ϩⲛ ⲁⲩⲁⲑ ⲛⲧⲉ ϩⲣⲁⲙⲙⲁ 20ⲁⲩⲱ ⲥⲁⲟⲩⲗ ⲁϥϫⲟⲟⲩ ⲛϩⲉⲛⲃⲁⲓϣⲓⲛⲉ ⲉϭⲱⲡⲉ ⲛⲇ︤ⲁ︦ⲇ︥ ⲁⲩⲱ ⲁⲩⲛⲁⲩ ⲉⲧⲉⲕⲕⲗⲏⲥⲓⲁ ⲛⲛⲉⲡⲣⲟⲫⲏⲧⲏⲥ ⲁⲩⲱ ⲥⲁⲙⲟⲩⲏⲗ ⲛⲉϥⲁϩⲉⲣⲁⲧϥ ϩⲓϫⲱⲟⲩ ⲡⲉⲡ︤ⲛ︦ⲁ︥ ⲇⲉ ⲙⲡⲛⲟⲩⲧⲉ ⲁϥⲉⲓ ⲉϫⲛ ⲛⲉⲃⲁⲓϣⲓⲛⲉ ⲛⲥⲁⲟⲩⲗ ⲁⲩⲡⲣⲟⲫⲏⲧⲉⲩⲉ ϩⲱⲟⲩ 21ⲁⲩⲧⲁⲙⲉⲥⲁⲟⲩⲗ ⲇⲉ ⲉⲡⲉⲛⲧⲁϥϣⲱⲡⲉ ⲁϥϫⲟⲟⲩ ⲛϩⲉⲛⲕⲉⲃⲁⲓϣⲓⲛⲉ ⲛⲧⲟⲟⲩ ϩⲱⲟⲩ ⲁⲩⲡⲣⲟⲫⲏⲧⲉⲩⲉ ⲁϥⲟⲩⲱϩ ⲉⲧⲟⲟⲧϥ ⲉϫⲟⲟⲩ ⲛϭⲓ ⲥⲁⲟⲩⲗ ⲙⲡⲙⲉϩϣⲟⲙⲛⲧ ⲛⲥⲟⲡ ⲛϩⲉⲛⲕⲉⲃⲁⲓϣⲓⲛⲉ ⲛⲧⲟⲟⲩ ϩⲱⲟⲩ ⲟⲛ ⲁⲩⲡⲣⲟⲫⲏⲧⲉⲩⲉ 22ⲥⲁⲟⲩⲗ ⲇⲉ ⲁϥⲛⲟⲩϭⲥ ϩⲛ ⲟⲩϭⲱⲛⲧ ⲁϥⲃⲱⲕ ϩⲱⲱϥ ⲉϩⲟⲩⲛ ⲉⲁⲣⲙⲁⲑⲁⲉⲓⲙ ⲁϥⲓ ϣⲁ ⲉϩⲣⲁⲓ ⲉⲧϣⲱⲧⲉ ⲛⲧⲉⲣϫⲛⲟⲟⲩ ⲉⲧϩⲛⲥⲉⲫⲓⲣ ⲥⲁⲟⲩⲗ ⲇⲉ ⲁϥϣⲓⲛⲉ ⲉϥϫⲱ ⲙⲙⲟⲥ ϫⲉ ⲉⲣⲉⲥⲁⲙⲟⲩⲏⲗ ⲛⲧⲱⲛ ⲡⲉϫⲁⲩ ⲛⲁϥ ϫⲉ ⲉⲓⲥ ϩⲏⲏⲧⲉ ϥϩⲛⲁⲩⲁⲑ ⲛⲧⲉ ϩⲣⲁⲙⲙⲁ 23ⲥⲁⲟⲩⲗ ⲇⲉ ⲁϥⲃⲱⲕ ⲉϩⲣⲁⲓ ⲉⲁⲩⲁⲑ ⲛⲧⲉ ϩⲣⲁⲙⲙⲁ ⲁⲩⲱ ⲡⲉⲡ︤ⲛ︦ⲁ︥ ⲙⲡⲛⲟⲩⲧⲉ ⲁϥⲓ ⲉϫⲱϥ ϩⲱⲱϥ ⲁⲩⲱ ⲛⲉϥⲙⲟⲟϣⲉ ⲉϥⲡⲣⲟⲫⲏⲧⲉⲩⲉ ϣⲁⲛⲧⲉϥⲉⲓ ⲉϩⲣⲁⲓ ⲉⲁⲩⲁⲑ ⲛⲧⲉ ϩⲣⲁⲙⲙⲁ 24ⲁⲩⲱ ⲁϥⲕⲁⲁϥ ⲕⲁϩⲏⲩ ⲛⲛⲉϥϩⲟⲉⲓⲧⲉ ⲁϥϭⲱ ⲉϥⲡⲣⲟⲫⲏⲧⲉⲩⲉ ⲙⲡⲙⲧⲟ ⲉⲃⲟⲗ ⲛⲥⲁⲙⲟⲩⲏⲗ ⲁⲩⲱ ⲁϥϩⲉ ⲉϩⲣⲁⲓ ⲉϥⲕⲏ ⲕⲁϩⲏⲩ ⲙⲡⲉϩⲟⲟⲩ ⲧⲏⲣϥ ⲉⲧⲙⲙⲁⲩ ⲁⲩⲱ ⲧⲉⲩϣⲏ ⲧⲏⲣⲥ ⲉⲧⲃⲉ ⲡⲁⲓ ⲛⲉⲩϫⲱ ⲙⲙⲟⲥ ϫⲉ ⲉⲛⲉⲥⲁⲟⲩⲗ ϩⲱⲱϥ ϩⲛ ⲛⲉⲡⲣⲟⲫⲏⲧⲏⲥ
Copyright information for
CopSahBible2